По триумфот на турнирот во Скопје во 2023 година, македонскиот тенисер Калин Ивановски повторно се искачи на победничкиот пиедестал, освојувајќи го и годинашното издание на Macedonian Open. За Ивановски ова беше 13-та победа на последните 14 натпревари, со што ја потврди одличната форма по враќањето на терените во јуни, по повеќемесечната пауза предизвикана од повреда.
„Се вратив, по една година повреди со многу маки. Голема чест е да се игра пред наша публика, ми дававте многу мотив и вчера и денес. Ми помогнавте да го освојам турнирот. Но, ова е само еден турнир. Треба многу сериозно да се работи. Целта ми е да се вратам да настапам на Гренд слем турнир ова е само прв чекор, “ изјави Ивановски за време на церемонијата на доделувањето на наградите.
Ивановски ја освои шестата титула во неговата тениска кариера, а втора на турнирот во Скопје.
За комплетниот впечаток на турнирот се погрижија Обрад Марковски и Горазд Србљак, кои вчера триумфираа во конкуренција на двојки.
