Македонската тенисерка, која стана првата од земјава што настапила во главниот жреб на најпрестижниот светски тениски турнир, доби признание за својот голем успех и за афирмацијата на македонскиот спорт на меѓународната сцена.
На средбата, министерот на спорт Борко Ристовски и честиташе на Ѓорческа, нагласувајќи дека нејзиниот резултат претставува историски момент и инспирација за сите млади спортисти.
„Лина, да знаеш дека цела Македонија и сите нѐ направи многу горди и среќни. Ова што го направи е историски успех и доказ дека македонскиот спорт има луѓе кои можат да се натпреваруваат на најголемата светска сцена“, истакна министерот.
Ѓорческа се заблагодари за приемот и поддршката, посочувајќи дека настапот на Вимблдон е исполнување на еден од нејзините најголеми спортски соништа, но и дополнителен поттик за нови предизвици и успеси.
Во текот на разговорот беше отворена и темата за идниот развој на македонскиот тенис и индивидуалните спортови, при што беше истакната потребата од континуирана институционална поддршка за спортистите кои ја претставуваат Македонија на најголемите светски натпреварувања.
Од Министерството за спорт порачаа дека ќе продолжат да вложуваат во создавање подобри услови за развој на талентираните спортисти и ќе останат силен партнер на оние кои со своите резултати ја промовираат државата на меѓународната спортска сцена.
