Македонскиот Дејвис куп репрезентативец Калин Ивановски успешно го започна настапот на ИТФ М25 турнирот во Загреб, откако во првото коло славеше против Јан Фацек од Чешка со 2-0 во сетови (6:2, 6:3) по 82 минути игра.
Ивановски одигра сигурен натпревар и уште во првиот сет ја наметна својата игра. Со два брејка, во првиот и петтиот гем, поведе со 5:1 и без проблеми го приведе сетот во своја корист со 6:2.
Во вториот сет се водеше поизедначена борба до резултат 3:3, по што македонскиот тенисер ја презеде иницијативата. Со два нови брејка врза три последователни гема и ја искористи втората меч-топка за конечни 6:3 и пласман во следната рунда.
Во осминафиналето Ивановски ќе се сретне со Павлос Циципас од Грција, кој во првото коло го совлада Кирил Кивацев со 2-0 во сетови.
Од македонските претставници во Загреб, утре настап ќе има и првиот носител Олег Приходко, кој ќе ги одмери силите со Хлеб Секачов. Покрај настапите во сингл конкуренција, Ивановски и Амар Хусеиновиќ, како и Приходко и Андреј Чепелев, ќе настапат и во двојки, што значи дека Ивановски и Приходко ги очекува исполнет натпреварувачки ден со по два меча.
