Љубителите на малиот фудбал и ова лето ќе имаат можност да бидат дел од вистински спортски спектакл, бидејќи во тек се пријавувањата за учество на традиционалниот турнир „Малеш Куп 2026“ во Берово, кој ќе се одржи во периодот од 17 до 25 јули на теренот кај Старата гимназија во Берово.
Турнирот, кој веќе се етаблира како еден од најдобрите и најпосетени спортски настани во источниот дел на Македонија, и оваа година најавува одлична организација, врвна атмосфера и голема конкуренција меѓу екипите.
Организаторите обезбедија атрактивен награден фонд, при што победникот ќе освои 130.000 денари, второпласираната екипа 70.000 денари, третото место носи 35.000 денари, додека четвртопласираниот тим ќе добие 10.000 денари.
Покрај наградите за најуспешните екипи, ќе бидат доделени и индивидуални признанија за најдобар стрелец, најдобар голман и најдобар играч на турнирот.
Котизацијата за учество изнесува 6.000 денари по екипа, а поради ограничениот број на учесници, организаторите апелираат заинтересираните екипи навреме да го резервираат своето место. За пријавување и дополнителни информации заинтересираните можат да се јават на телефонскиот број 078 227 062 (Методи).
Спортска Мрежа и оваа година ќе биде медиумски покровител на „Малеш Куп“, продолжувајќи ја успешната соработка која трае уште од самото формирање на турнирот. Од првото издание во 2022 година, кога започна приказната за „Малеш Куп“, нашиот портал е медиумски покровител на овој спортски настан, кој денес со право важи за еден од најдобрите турнири во Источна Македонија.
Секоја вечер ќе имате можност да ги читате деталните извештаи за сите натпревари преку фотографии и видеа, ова е одлична можност за сите екипи и нивните спонзори за дополнителна медиумска промоција.
Соберете ја вашата екипа и бидете дел од уште едно незаборавно издание на „Малеш Куп 2026“ во Берово!
