ГРК Охрид направи голем чекор кон европскиот трофеј, откако славеше на гостувањето кај МОЛ Татабања со 29-28 во првиот финален натпревар од ЕХФ Европскиот Куп. Македонскиот претставник во драматична завршница успеа да стигне до триумф, па така одлучувачката битка за титулата ќе се води следниот викенд во преполните трибини на „Билјанини извори“.
Охриѓани одиграа фантастично прво полувреме и целосно го контролираа натпреварот во Унгарија. Избраниците на Борис Ројевиќ со цврста и агресивна одбрана го оттурнаа ривалот од ритам уште на стартот, а одличниот Кристијан Пилиповиќ беше еден од клучните фактори за високата предност. Домашниот состав имаше долги „црни минути“ без погодок, што Охрид го искористи за серија и водство од 2-6, а на паузата македонскиот тим замина со сигурни 8-13.
Во продолжението Татабања се обиде да се врати во игра, но Охрид долго време успешно ја одржуваше предноста. Покрај Пилиповиќ, значајна улога имаше и Јасухира, додека Дарко Ѓукиќ и Анте Иванковиќ беа главните реализатори во нападот. Во редовите на унгарскиот тим настапи и македонскиот репрезентативец Филип Талески, кој постигна атрактивен погодок со цепелин.
Иако во еден момент Охрид имаше и шест гола предност (19-25), финишот донесе огромна неизвесност. Татабања направи серија и успеа да се врати целосно во натпреварот, а на две минути пред крајот резултатот беше израмнет. Домашниот тим дури стигна и до првото водство на мечот преку Родригез за 28-27, но Охрид не се предаде. Иванковиќ најпрво израмни, а по важната интервенција на Пилиповиќ, Дарко Ѓукиќ на само три секунди до крајот стрелаше за голема победа и ерупција на радост кај македонскиот состав.
Најефикасни кај Охрид беа Дарко Ѓукиќ и Анте Иванковиќ со по седум погодоци, додека Кристијан Пилиповиќ мечот го заврши со десет одбрани. Кај Татабања се издвои Елеш Бенедек со девет гола, а Филип Талески двапати се запиша меѓу стрелците.
Реванш натпреварот, кој ќе го даде новиот освојувач на европскиот трофеј и наследник на РК Алкалоид, ќе се игра следниот викенд во Охрид.
