ГРК Охрид во недела (24.05) ќе го започне најважниот двомеч во својата европска историја, откако во финалето на ЕХФ Европскиот Куп ќе се соочи со екипата на унгарска Татабања.
Во пресрет на првиот финален натпревар, шпанскиот дефанзивец на охриѓани- Реј Моралес, во изјава за Спортска Мрежа, истакна дека Охрид го очекува сериозен предизвик против најквалитетниот противник со кој се соочиле сезонава во ЕХФ Купот. Според него, клучно ќе биде македонскиот тим да оствари позитивен резултат на гостински терен, но и да остане смирен и фокусиран, бидејќи финалето се решава низ два натпревари.
„Нѐ очекува многу тежок натпревар против Татабања. Тоа е најдобриот тим против кој сме играле досега во ова европско натпреварување. Мислам дека нашите шанси за освојување на титулата зависат од тоа да оствариме добар резултат таму и да останеме смирени, имајќи предвид дека ова е финале кое трае 120 минути.“ – изјави Моралес за Спортска Мрежа.
Првиот финален натпревар ќе се одигра утре, од 17:00 часот во Унгарија, додека реваншот седум дена подоцна ќе се одигра во преполната сала „Билјанини извори“, каде охриѓани пред своите навивачи, ќе се обидат да испишат историја и да стигнат до европскиот трофеј.
