ГРК Охрид продолжува со сериозното засилување на тимот за новата сезона, откако клубот го претстави Шуичи Јошида како шесто официјално засилување за сезоната 2026/2027.
Станува збор за 25-годишниот јапонски репрезентативен пивот, висок 193 сантиметри, кој во Охрид доаѓа со богато интернационално искуство и ќе го носи дресот со број 5. Договорот е потпишан на една сезона со можност за продолжување и за сезоната 2027/2028.
Јошида во редовите на охридскиот суперлигаш пристигнува од францускиот гигант Нант, каде настапуваше две сезони и играше важна улога и во домашното првенство и во Лигата на шампионите. Пред ангажманот во Нант, јапонскиот интернационалец настапуваше и за Данкерк во Франција, како и за Азоти Тарнов во Полска.
Покрај клупските успеси, Јошида е стандарден член и прв пивот на репрезентацијата на Јапонија, а во 2024 година беше прогласен и за најдобар пивот на Азиското првенство.
„Здраво Охрид! Здраво Рибари! Јас сум Шуичи Јошида, јапонски репрезентативен пивот. Премногу сум среќен што ќе го облечам дресот на ГРК Охрид и со нетрпение чекам да заиграм за овој клуб и да ги запознам нашите навивачи! Се гледаме наскоро Охриде!“, изјави Шуичи Јошида.
Со ангажманот на Јошида, ГРК Охрид јасно покажува дека има високи амбиции за следната сезона и дека сака уште поконкурентен тим на домашната и европската сцена.
