МЗТ Скопје на победа до титулата – Маџари загуби во „Јане Сандански“

„Металците“ одиграа сигурно во најголемиот дел од натпреварот и уште во првото полувреме создадоа убедлива предност од 47:31, со што го контролираа текот на мечот во салата „Јане Сандански“.

Иако Маџари во вториот дел успеа да се врати резултатски и во финишот да намали на само три поени негатива (76:79), сепак избраниците на МЗТ останаа смирени во клучните моменти. Гостите имаа и напад за израмнување, но Димчевски не реализираше обид за три поени, по што Петков со сигурни слободни фрлања ги постави конечните 81:76.

Најефикасен во победничкиот состав беше Смит МекСвејн со 19 поени, осум скока и три асистенции, додека Војдан Стојановски натпреварот го заврши со 18 поени.

Кај Маџари најрасположен беше Луис со 25 поени, а солиден настап имаа и Армстронг со 17, Хот со 14 и Савиќ со 11 поени.

Третиот натпревар од финалната серија се игра во недела, кога Маџари ќе биде домаќин и ќе се обиде да ја продолжи битката за титулата, додека МЗТ Скопје ќе ја бара третата победа и нов шампионски пехар.