Во фокусот на ракометната јавност вечерва ќе биде реванш-средбата од четвртфиналето во Лигата на Европа, каде што РК Вардар 1961 на домашен терен ќе се соочи со Монпелје.
Скопскиот состав се наоѓа пред исклучително тешка задача, откако на првиот дуел во Франција претрпе убедлив пораз од 33-23. Со оглед на високата негатива, „црвено-црните“ ќе треба да одиграат речиси перфектен натпревар доколку сакаат да се надеваат на пресврт и пласман на завршниот турнир.
Тренерот Иван Чупиќ за овој натпревар ќе ги има на располагање Дмитро Горига и Јака Малус, но нивната минутажа останува неизвесна. Во однос на првиот меч, во составот нема да биде Марио Танкоски.
На спротивната страна, францускиот тим ќе настапи со речиси идентичен состав, со исклучок на повредените Турин, Пелас и Балагер, кои нема да бидат во комбинација за настап.
Дуелот се игра во спортскиот центар СЦ Јане Сандански со почеток од 20:45 часот.
