Возбудливи натпревари донесе најновото коло во домашниот шампионат, во кое Струга Трим Лум беше поразена на домашен терен од АП Брера, додека Тиквеш и Арсими ги поделија бодовите во Кавадарци.
Во Струга, домаќинот може да жали за пропуштените шанси. Тимот на Бледи Шкемби создаде најмалку шест стопроцентни прилики, но не успеа да ја затресе мрежата. Малески ја имаше првата голема можност по одлична акција со Илиевски и Радески, но шутираше крај голот. Следуваа обиди на Шабани, Зенделоски и Фал, но расположениот голман Диковски беше несовладлив.
Во второто полувреме темпото опадна, а клучниот момент се случи во 72. минута кога Хамза доби директен црвен картон, оставајќи ја Струга со играч помалку. И покрај тоа, домашните продолжија да напаѓаат и преку Бојку, Шабани, Илиевски и Малески се обидоа да стигнат до водство, но без успех. Казната стигна во 88. минута, кога Петровиќ со одличен продор ја проби одбраната и го совлада Ангелети за три бода на гостите.
Во Кавадарци, Тиквеш одигра храбро реми против Арсими (1-1), иако повеќе од 70 минути настапуваше со фудбалер помалку. Камара заработи директен црвен картон во 18. минута по ВАР интервенција, но и покрај тоа домаќините поведоа шест минути подоцна преку Бесир Рамадани, кој погоди со глава по слободен удар.
Арсими брзо возврати преку Гони по асистенција на Рамадани, а до крајот на првото полувреме Стојановски пропушти голема шанса, откако Сиљановски одлично интервенираше. Во вториот дел гостите го диктираа темпото, Велија ја погоди стативата, а Рамадани повторно се закани, но без реализација. Во завршницата Авдули се обиде од слободен удар, но резултатот остана непроменет.
Коло во кое пропуштените шанси скапо ја чинеа Струга, додека Тиквеш покажа карактер и извлече вреден бод со играч помалку.
