Ракометарите на ГРК Охрид по историскиот пласман во финалето на ЕХФ Европскиот куп веќе го знаат и распоредот за најважните натпревари во сезоната.
Во битката за трофејот, „гладијаторите“ ќе се соочат со унгарската Татабања, тим во кој настапува и македонскиот репрезентативец Филип Талески.
Европската ракометна федерација ги одреди термините за финалниот двомеч – првиот натпревар ќе се одигра на 23 или 24 мај, додека реваншот е закажан за 30 или 31 мај, кога ќе биде познат и освојувачот на трофејот.
Сè уште не е познато каде ќе се одигра првиот меч, бидејќи тоа ќе биде одлучено со дополнителна ждрепка во Виена, која ќе утврди кој тим ќе има предност на домашен терен во првата средба.
Охрид има шанса да испише нова историја и да ја круниса фантастичната европска сезона со трофеј.
