Југоисточна Македонија во месец мај повторно ќе биде во знакот на младинскиот фудбал, а Интернационал Мастерс Куп 2026 продолжува да ја зацврстува својата елитна репутација со нови учесници во фокусот.
Најново потврдени екипи кои ќе бидат дел од турнирот се грчкиот Пансерраикос ФК и српската академија АК Фудбала 11. Станува збор за две реномирани средини кога е во прашање развојот на млади фудбалери. Пансерраикос, клуб со богата традиција и силна младинска школа, доаѓа подготвен да го демонстрира својот талент и натпреварувачки дух, додека АК Фудбала 11 важи за модерна академија со јасна визија – создавање дисциплинирани играчи и идни фудбалски ѕвезди.
Со нивното приклучување, конкуренцијата добива дополнителна тежина. Во листата на учесници веќе се наоѓаат и звучни имиња како Црвена Звезда, Бешикташ, Панатинаикос, Гент, Фенербахче, како и Чукарички – клуб кој годинава одбележува 100 години постоење и е препознатлив по својата квалитетна младинска школа.
Турнирот ќе се одржи од 22 до 24 мај во Валандово, Дојран и Гевгелија, каде љубителите на фудбалот ќе имаат можност да уживаат во вистински младински спектакл.
Ќе настапат екипи во повеќе возрасни категории (U8 до U12), со модерен систем на натпреварување кој вклучува групна и нокаут фаза, како и загарантирани повеќе натпревари за секој тим. Организаторите најавуваат врвни услови за игра, професионално судење и силен акцент на фер-плеј и развојот на младите фудбалери.
Интересот за учество е огромен, а пријавите се веќе во тек. Поради ограничениот број на места, клубовите се повикуваат навреме да го обезбедат своето место.
Спортскиот портал „Спортска Мрежа“ ќе биде ексклузивен медиумски покровител на турнирот, обезбедувајќи целосно медиумско покривање со вести, фотографии и видеа, како и преноси во живо на YouTube каналот на Спортска Мрежа.
Со ваков состав на учесници, Интернационал Мастерс Куп 2026 сериозно се наметнува како еден од најпрестижните младински турнири во регионот, додека Валандово, Дојран и Гевгелија ќе бидат домаќини на вистински фудбалски празник.
