Вечерва со почеток од 18:00 часот, во салата „Димитар Влахов“ во Струмица, започнува финалната серија од плејофот во женска одбојкарска конкуренција. Во борба за шампионската титула ќе се сретнат Наковски Волеј, кој првпат во својата клупска историја игра финале, и најтрофејниот женски тим Работнички Скопје, кој ќе се обиде да стигне до нов пехар.
Серијата стартува во Струмица, бидејќи Наковски Волеј регуларниот дел од сезоната го заврши на првото место, со само еден пораз – од Младост УГД (3:2). По неуспехот да ја одбранат Куп-титулата, одбојкарките на Хари Наковски сега се целосно насочени кон освојување на шампионската круна.
Токму Наковски Волеј беше тимот што го елиминираше бранителот на титулата Јанта Волеј КВ, славејќи во полуфиналната серија со 3:1 и 3:0. Тимот покажа константност во текот на целата сезона и сега го прави последниот чекор кон историски успех.
Од друга страна, Работнички Скопје има големо финално искуство – ова е нивно петто последователно финале, во кое ќе атакуваат на 19. шампионска титула. Тимот на Душко Деспотовски имаше променлива форма во текот на сезоната, но во завршницата, особено против Младост УГД, делуваше максимално подготвено.
Во меѓусебните дуели од регуларниот дел, Наковски Волеј има предност од 2:0, со максимални 3:0 во сетови.
Финалната серија се игра до три добиени натпревари, а сите средби ќе бидат директно пренесувани на националниот сервис.
