Шкендија денеска нема простор за грешка – победа е единствената опција против Башкими во 29. коло од ПМФЛ. Актуелниот шампион мора да стигне до трите бода ако сака да остане рамо до рамо со Вардар во битката за титулата, откако скопјани со триумфот над Тиквеш избегаа на +4 на табелата.
Тетовските „црвено-црни“ сезонава веќе двапати го совладаа Башкими и добро го познаваат „рецептот“ за успех. Сега останува тој план да го применат и на денешниот дуел, со цел повторно да ја намалат разликата на само еден бод во трката со најголемиот ривал.
Голманот Бабубакар Гаје предупредува дека ваквите натпревари се најнезгодни, нагласувајќи дека максималната концентрација ќе биде клучна од првата до последната минута. Тој додава дека амбициите на Шкендија се јасни – освојување на двојната круна оваа сезона.
„Мораме да го сфатиме овој натпревар многу сериозно. Најопасните мечеви се против тимовите кои се борат за опстанок, затоа што тие секогаш наоѓаат мотивација против оние екипи кои се борат за највисок пласман. Мораме да бидеме фокусирани од првата до последната секунда, да не правиме грешки и да ја контролираме играта. Нашата цел сезонава е двојна круна, односно титула во шампионатот и пехар во Купот на Македонија“, рече Гаје.
