Тиверија Брера ја однесе најубедливата победа во 22. коло на Првата женска фудбалска лига, совладувајќи го Топ Гол во Битола со 1:9.
Теона Галабовска постигна хет-трик за струмичкиот тим, додека пак Билјана Панеска постигна два гола, а по еден гол во мрежата на Топ Гол постигнаа Данче Карпузовска која го отвори резултатот, Стефанија Божиновска, Павлинка Николовска и Ане Бошеска.
За домашниот тим единствен стрелец во 42. минута беше Мила Коњановска.
Единствениот меч кој заврши без погодоци беше тој меѓу Речица и Вардар, кој ги поделија бодовите играјќи 0:0.
Лидерот и нов шампион Скопје со убедливи 1:6 го декласираше Кочани на гостински терен. Во високата и убедлива победа Мила Панева беше двоен стрелец, а по еден гол постигнаа Ана Боризоска, Рабија Дервиши, Емилија Ивковиќ и Кристина Крстева. Сара Коларовска си постигна автогол.
Дербито на колото во Македонска Каменица заврши без победник, откако Каменица Саса и Истатов ги поделија бодовите играјќи 2:2 во возбудлив и атрактивен меч.
Андреа Коловска по само пет минути игра во малото рударско гратче го отвори резултатот за водство од 0:1, а до крајот на првиот дел „рударките“ направија комплетен пресврт.
Во 23. минута најдобриот стрелец во шампионатот Ана Димитровска погоди за 1:1, а само три минути подоцна Јована Петрушовска беше прецизна за 2:1 и водство на Саса.
Во вториот дел Елма Шемсовиќ во 52. минута успеа да постигна погодок и да ги постави конечните 2:2 за делба на бодовите.
Љуботен на домашен терен со 4:2 славеше триумф над струшки Ас Јунајтед. Улза Максути постигна два погодоци во мрежата на својот поранешен клуб, а по еден гол имаа Хава Мустафа и Елена Симјанова.
За гостинот од Струга стрелец на двата гола беше Оливера Цоклеска.
На врвот е Скопје со 63 бодови, втор е тимот на Тиверија Брера со 48 бодови, а Љуботен изби на третото место со 46 бодови. Бод помалку има Истатов кој е четврти.
На петтото место е Каменица Саса која има 37 бодови, Ас Јунајтед шести со 34 бодови. Вардар е седми со 16 бодови, а Речица е осма со 12 бодови.
На претпоследното место или во бараж зоната за опстанок е Кочани кој има седум бодови, а на дното е Топ Гол со четири бодови и се обидува да дојде до деветтото место и преку бараж да се избори за опстанок.
