Општина Радовиш во соработка со Сојузот на училишен спорт на Радовиш и оваа година подготвува богата и разновидна спортска програма во рамки на традиционалните Првомајски натпревари, кои ќе донесат динамика, забава и спортски дух за сите генерации.
Главниот настан е закажан за 30 април со почеток од 11:00 часот, кога ќе се одржат атлетски трки на 400 и 600 метри. Во нив ќе учествуваат момчиња и девојчиња од основните и средните училишта, а стартот е предвиден пред „Парк Марди“.
Во рамки на програмата ќе се одржи и традиционалната трка на келнери, која ќе се реализира на градскиот плоштад во Радовиш и секогаш привлекува големо внимание кај публиката поради својот забавен и натпреварувачки карактер.
Спортските активности ќе продолжат и на 3 мај 2026 година, кога ќе се одржи натпреварот во спортски риболов „Трофеј Мантово“, кој претставува уште еден значаен дел од првомајските случувања.
Организаторите најавуваат дека за најуспешните учесници се обезбедени награди, со што дополнително се поттикнува спортскиот дух и учеството.
Првомајските натпревари во Радовиш претставуваат одлична можност за дружење, рекреација и промоција на спортот, а се очекува и оваа година да привлечат голем број учесници и посетители.
Претседател на Сојузот на училишен спорт на Радовиш е Игор Конзулов, а во следниот период се предвидени низа спортски активности.
