Со минималната негатива од првиот полуфинален натпревар против Целје, ракометарите на ГРК Охрид ја задржаа реалната шанса за историски пласман во финалето на ЕХФ Европскиот куп. Иако мечот донесе големи осцилации во играта, охриѓани во клучните моменти покажаа зрелост и изборија резултат кој остава простор за голема битка на домашен терен.
Голманот на охриѓани, Бојан Блажески веднаш по мечот во изјава за Спортска Мрежа, оцени дека натпреварот бил исклучително тежок против квалитетен и млад противник, потенцирајќи дека тимот имал падови во играта, но сепак успеал да извлече позитивен исход во контекст на двомечот. Тој нагласи дека сè уште ништо не е решено и дека следните 60 минути во Охрид ќе бидат клучни за остварување на целта. Воедно, упати благодарност до навивачите за поддршката во Словенија и повика на масовна поддршка на реваншот.
„Денес имавме тежок натпревар против одлична екипа. Имавме доста осцилации во играта, но на крајот извлековме одличен резултат против една фантастична, млада екипа. Сè уште ништо не е решено и уште 60 минути нè делат од европско финале. Им благодариме на нашите навивачи за денешната поддршка во Целје и очекуваме полна сала и да славиме сите заедно во Билјанини Извори“. – изјави Блажески за Спортска Мрежа.
Реваншот во „Билјанини Извори“ ќе биде вистинска кулминација на овој двомеч, во кој Охрид пред својата публика ќе се обиде да ја надополни минималната негатива и да испише нова страница во клупската историја.
