Комисијата за женски фудбал при ФФМ донесе одлука со која се замрзнува табелата во Втората женска фудбалска лига за сезоната 2025/26, по што првенството и официјално нема да продолжи, а е утврдена и конечна табела заклучно со одиграното 10-то коло.
Одлуката е донесена на седница одржана на 24.04.2026 година, врз основа на член 30, 31, 31а и 32 од Пропозициите за натпреварување во Втора ЖФЛ, како и член 104 и член 25 од Правилникот за натпреварување на ФФМ.
Клучна причина за ваквата одлука е дисквалификацијата на ЖФК Порече 2015 од Македонски Брод, со што бројот на активни екипи во лигата се намалил од шест на пет. Со тоа, како што е наведено, не е исполнет минималниот услов од најмалку шест клубови за продолжување на регуларно натпреварување, согласно правилникот на ФФМ.
Во образложението се наведува дека до моментот на прекин се одиграни повеќе од 50%, а помалку од 75% од предвидените натпревари, поради што се исполнети условите за утврдување на конечна табела и доделување на пласман во повисок ранг.
Комисијата утврди дека лигата започнала со шест клубови, но по исклучувањето на ЖФК Порече 2015, натпреварувањето повеќе не ги исполнува пропишаните услови за продолжување, поради што е донесена одлука за негово завршување.
- ОФИЦИЈАЛНА ТАБЕЛА ВО ВТОРАТА ЖЕНСКА ФУДБАЛСКА ЛИГА:
| Поз. | Клуб | ОН | Поб | Н | Пор | ПОС | ПРИ | ГР | БОД |
|---|---|---|---|---|---|---|---|---|---|
| 1 | ЖФК КОНЗУЛИ ЈУНАЈТЕД | 10 | 10 | 0 | 0 | 76 | 2 | +74 | 30 |
| 2 | ЖФК БИЛЈАНИНИ ИЗВОРИ 2010 | 10 | 7 | 1 | 2 | 55 | 14 | +41 | 22 |
| 3 | ЖФК ПОРЕЧЕ 2015 | 10 | 5 | 1 | 4 | 29 | 23 | +6 | 16 |
| 4 | ФК Слободен/ЖФК | 10 | 3 | 0 | 7 | 16 | 60 | -44 | 9 |
| 5 | ЖФК БОРЕЦ | 10 | 2 | 1 | 7 | 12 | 55 | -43 | 7 |
| 6 | ЖФК ПЛАЧКОВИЦА | 10 | 1 | 1 | 8 | 6 | 40 | -34 | 4 |
