Екипата на Пелистер запиша убедлива победа во дерби натпреварот од третото коло на ТОП 8 фазата, откако на домашен терен во Битола ја совлада водечката екипа во првенството ТФТ со високи 105:69. Со овој триумф „зелено-белите“ ја отворија трката за првото место во регуларниот дел од сезоната.
Домашниот состав имаше одличен старт и уште од првата четвртина ја најави победата, откако по десет минути игра стекна убедлива предност од 32:17. До полувремето, Пелистер целосно доминираше на паркетот и замина на одмор со огромни 66:37.
Во продолжението ТФТ успеа делумно да се консолидира и ја доби третата четвртина (53:78), но тоа беше единствениот посериозен отпор на гостите, бидејќи разликата од првото полувреме беше недостижна.
Пелистер имаше балансиран напад, а сите пет стартери завршија со двоцифрен учинок. Дејвис и Вилсон постигнаа по 20 поени, при што Вилсон додаде и 11 скока. Џенкинс реализираше 18 поени, Малешевиќ 11 поени и 12 скока, додека Митревски запиша 10 поени. Од клупата се истакна Лука Стојановски со 12 поени и 5 асистенции.
Со оваа победа Пелистер стигна до 17. триумф во сезоната, наспроти 8 порази, додека ТФТ сега има скор 21-4, исто како и МЗТ Скопје Аеродром, но поради службен пораз, скопскиот тим останува лидер на табелата.
Кај ТФТ, Стојаноски постигна 16 поени и имаше 9 скока, Дејвис додаде 15, а Зафиров и Ташовски завршија со по 10 поени.
