Во насока на стабилизација и унапредување на домашната кошарка, Управниот одбор на Кошаркарската федерација на Македонија на денешната седница донесе и разгледа повеќе значајни одлуки.
Во рамките на усвоениот дневен ред, беше донесена одлука за регулирање на финансиските обврски на клубовите. Според неа, за старите долгови се овозможува подмирување со 40% попуст, најдоцна до 31 мај, додека за обврските од тековната сезона е предвиден попуст од 20% со рок за исплата до 20 јуни.
Со оваа мерка се очекува значително финансиско растоварување на клубовите и поставување основа за постабилен и дисциплиниран систем во пресрет на новата натпреварувачка сезона.
На седницата беше отворена и расправа по Предлог-правилникот за лиценцирање на клубовите за настап во системот на натпреварување во Македонија, кој ги опфаќа МТЕЛ Супер лигата (мажи), Првата лига – жени и Првата лига – мажи.
Правилникот е структуриран во 12 целини, меѓу кои се општите одредби, условите за лиценцирање, спортските, инфраструктурните, административните, финансиските, организациските и етичките критериуми, како и постапката за лиценцирање, видовите лиценци, контролата и ревизијата, и завршните одредби.
Управниот одбор ја потврди определбата за воведување јасен и строг лиценцен систем, при што ги задолжи стручните служби на федерацијата да спроведат дополнителна анализа на Предлог-правилникот.
Во рок од осум дена, тие треба да извршат детална проверка на предложените решенија, особено од спортски и правен аспект, да предложат конкретни подобрувања и да понудат јасни и применливи решенија со цел создавање функционален и одржлив систем за лиценцирање.
По доставување на нивните предлози, Управниот одбор ќе пристапи кон конечно усвојување на Правилникот.
