Фудбалскиот клуб Брегалница од Штип паралелно работи и надвор од теренот и на него, со јасна цел – враќање во елитата. Вчера започнаа активности за целосно освежување на клупските простории и апартмани на Градскиот стадион во Штип.
Во рамки на оваа акција се спроведува темелна дезинфекција, дератизација, генерално чистење и обелување на целиот објект. Опфатени се сите клупски простории, како и апартманите кои се во сопственост на клубот, со што Брегалница создава подобри услови за работа и престој на фудбалерите и стручниот штаб.
Овие активности доаѓаат во период кога тимот бележи одлични резултати на теренот. На пет кола до крајот на сезоната во Втората лига, Брегалница се наоѓа на првото место на табелата со 58 освоени бодови, два повеќе од директните конкуренти Охрид, Скопје и Шкендија Арачиново.
Со ваква позиција и форма, штипскиот состав е на добар пат кон директен пласман во Првата лига, што би било круна на одличната сезона. Комбинацијата од стабилни резултати и подобрување на инфраструктурата покажува дека Брегалница сериозно ја гради својата иднина – како на теренот, така и надвор од него.
