Ракометарките на Ѓорче Петров уште еднаш потврдија дека се доминантна сила во македонскиот женски ракомет, откако во финалето од Купот на Македонија во Струмица го совладаа храбриот Спартак со 33-30 и го одбранија трофејот.
Иако фаворит на хартија, „лавиците“ не дојдоа лесно до победата. Спартак одигра одличен натпревар и во повеќе наврати сериозно му се закани на искусниот ривал. Во текот на првото полувреме се водеше израмнета борба, но во самиот финиш Ѓорче Петров успеа да создаде позначајна предност и на паузата замина со водство.
Во вториот дел, актуелниот шампион ја зголеми разликата и во еден момент изгледаше дека го контролира текот на натпреварот, но ракометарките на Спартак не се предадоа. Со серија добри напади и цврста одбрана, тимот од Кисела Вода успеа да се врати во игра и да внесе неизвесност во завршницата.
Во последните минути, кога се кршеше резултатот, пресуди искуството на ѓорчепетровки кои беа посмирени и поконкретни во клучните моменти, па не дозволија изненадување и стигнаа до нов трофеј – вкупно 19-ти во ова натпреварување.
И покрај поразот, Спартак остави одличен впечаток. Со пласманот во своето прво финале и со изданието против фаворитот, јасно стави до знаење дека располага со квалитет и потенцијал за големи дострели во иднина.
Финалето во Струмица донесе возбудувања, квалитетен ракомет и потврда дека покрај доминацијата на Ѓорче Петров, македонскиот женски ракомет добива нови амбициозни предизвикувачи.
