Кошаркарската сезона во Аматерската лига влегува во својата кулминација, а денес во Гевгелија ќе падне одлуката кој ќе обезбеди пласман во Првата лига. Домашниот состав и Шар Планина ќе ги одмерат силите во решавачкиот трет натпревар од финалната серија.
Гевгеличани веќе покажаа квалитет во првиот дуел, кога убедливо славеа со 91-56 и најавија дека се сериозен кандидат за елитата. Сепак, возвратниот натпревар донесе сосема поинаква слика – тимот од Гостивар одигра далеку поконцентрирано пред својата публика и со победата од 68-56 ја израмни серијата на 1-1.
Така, шампионот ќе се решава во „мајсторка“, натпревар кој носи огромен влог – пласман во најсилното домашно натпреварување. За Гевгелија ова би бил двоен успех, откако и женскиот тим веќе обезбеди промоција во Првата лига.
Одлучувачкиот меч се игра денес од 16:00 часот во спортската сала „26 април“, каде се очекува голема поддршка од домашната публика и вистинска кошаркарска атмосфера.
