Вардар Неготино практично ја загуби битката за опстанок во Втората македонска фудбалска лига и од наредната сезона ќе се натпреварува во Третата лига – Југ. По неколку турбулентни месеци и серија слаби резултати, неготинци сами си ја искомплицираа ситуацијата и дозволија да испаднат од второлигашкото друштво.
Само пред две сезони клубот обезбеди пласман во Втора лига преку бараж, а веднаш потоа следеше и одлична сезона со освоено шесто место и позитивна атмосфера околу тимот. „Винарите“ тогаш беа вистински хит и играа допадлив фудбал пред својата публика.
Минатата сезона донесе поголема неизвесност, но опстанокот беше обезбеден во финишот. Сепак, тековната сезона се покажа како кобна. Слабите резултати во есенскиот дел, како и неубедливиот старт на пролетта, го оттурнаа тимот кон зоната за директно испаѓање.
Иако постоеја теоретски шанси за спас, резултатите на теренот не беа на нивна страна. Посебно болно беше ремито против Слога во Виница (3-3), натпревар во кој испуштените бодови можеа да значат многу повеќе во борбата за опстанок.
Враќањето на тренерот Горан Тодорчев донесе одредена стабилизација, но веќе беше доцна за посериозен пресврт. Младиот и неискусен состав не успеа да одговори на предизвиците.
До крајот од сезоната остануваат уште пет кола или 15 бодови во игра, а Вардар Неготино има десет бодови негатива од бараж зоната, но реалните шанси се дека тимот не може да ги освои овие бодови.
Сега пред Вардар Неготино следи нов почеток и многу прашања околу иднината на клубот. Едно е сигурно – од следната сезона, на „Цвај арената“ повторно ќе се игра третолигашки фудбал.
