Фудбалерите на Пелистер одиграа квалитетен натпревар и сосема заслужено славеа со 2-0 против Македонија ЃП, правејќи значаен чекор во борбата за опстанок во Првата македонска лига.
Битолчани уште од стартот ја презедоа иницијативата и постојано се закануваа кон противничкиот гол. Иако создадоа повеќе можности во првото полувреме, реализацијата изостана, па на пауза се замина без голови, и покрај неколкуте сериозни закани, особено преку Спировски и Булатовиќ.
Домашниот тим конечно го скрши отпорот на гостите веднаш на стартот на вториот дел. По добро изградена акција, капитенот Мирко Ивановски беше на вистинското место и донесе водство од 1-0. Работите дополнително се олеснија за Пелистер по исклучувањето на играч на Македонија ЃП, што овозможи уште поголема контрола на теренот.
Победата беше заверена со вистински еврогол на Србијанац, кој со силен удар од дистанца ја затресе мрежата за конечни 2-0. До крајот, Пелистер можеше и поубедливо да слави, но не ги искористи шансите.
Со овие три бода, Пелистер се искачи на деветтата позиција со 29 бодови, додека Македонија ЃП останува во опасната зона и ја продолжува негативната серија без победа.
Во следното коло, битолчани ќе гостуваат кај Брера, додека Македонија ЃП ќе има нов тежок предизвик против Работнички.
