Ракометарите на Вардар повторно ќе играат во финалето на Купот на Македонија, откако во полуфиналната пресметка убедливо го совладаа градскиот ривал Алкалоид со 33-28. Тимот на Иван Чупиќ ја потврди фаворитската улога и со сигурна игра во второто полувреме го скрши отпорот на противникот.
Натпреварот започна со подобро издание на Алкалоид, кој рано поведе и наметна ритам, но Вардар брзо се стабилизираше и успеа резултатски да се врати. И покрај тоа што „црвено-црните“ уште во раната фаза останаа без Урош Митровиќ поради црвен картон, тимот не ја загуби контролата. Напротив, со добра игра во нападот и сигурност во одбраната постепено го презеде водството.
Вардар потоа остана без уште еден играч откако Милан Лазаревски доби црвен картон.
До крајот на првиот дел се водеше израмнета борба, а Вардар на пауза замина со минимална предност. Второто полувреме донесе сосема поинаква слика – актуелниот освојувач на трофејот заигра поагресивно и со неколку серии направи клучна разлика. Голманот Валах беше еден од најзаслужните за тоа, додека во нападот се истакнаа Малус и Тузолана, кои беа нерешлива енигма за одбраната на Алкалоид.
Во еден период Вардар стигна и до двоцифрена предност, со што практично го реши прашањето на победникот. До крајот, тренерот Чупиќ им даде шанса и на помладите играчи, а Алкалоид само успеа да го ублажи поразот.
Во редовите на Вардар најрасположен беше Јака Малус, додека свој придонес даде и голманот Валах со значаен број одбрани. Кај Алкалоид се истакнаа неколку поединци, но отсуството на дел од стандардните играчи се почувствува во текот на целиот меч.
Во големото финале, кое ќе се одигра во недела во Струмица со почеток од 20:00 часот, Вардар ќе се соочи со екипата на Охрид, која во другото полуфинале го елиминираше Еурофарм Пелистер. „Црвено-црните“ ќе имаат можност да го бранат трофејот и да стигнат до ново куп славје.
