АП Брера влегува во овој натпревар со само една победа во последните пет кола во Првата лига, па избраниците на Мартин Алаѓозовски ќе се обидат денеска во Кратово да се вратат на победнички патеки. Задачата нема да биде лесна, бидејќи гостувањето кај Силекс секогаш носи голем предизвик. Сепак, струмичани се мотивирани – нивната јасна цел е да го избегнат баражот и да обезбедат директен опстанок во елитното друштво.
„На последните два меча ремизиравме, а бодови ни се потребни за да ја оствариме нашата цел. Имаме респект за Силекс, кој повторно ја пронајде својата добра форма, но ние посакуваме успех на ова гостување во Кратово. Нема да биде лесно, но ќе сториме сѐ да ја оствариме нашата цел“, порачува стратегот на АП Брера, Мартин Алаѓозовски.
Натпреварот меѓу Силекс и АП Брера се игра денес на Градскиот стадион во Кратово, со почеток во 13 часот.
