Одбојкарите на Штип УГД со убедлива победа од 3-0 во сетови над ГОК Борец ја отворија финалната серија за шампионската титула.
Тимот на Кристиан Ристески одигра фантастичен и доминантен меч, лидерот во првенството имаше контрола во текот на целиот натпревар, а мала неизвесност имаше само во вториот сет.
Актуелниот освојувач на Купот на Македонија првиот сет го доби со 25:15, а тоа за велешани значеше дека во вториот сет ќе мора нешто подобра игра. Отпор имаше, но не доволно, одново штипјани го освоија сетот, но овој пат со 25:22. Во третиот сет Штип УГД ја потврди победата откако го освои сетот со 25:17.
Ова беше реприза на Куп финалето, но сега штипјани беа далеку подоминантни во самата игра и тимот од градот под Исарот оди по нова историја, да се освои по првпат шампионската титула и со тоа Штип УГД да ги обедини двете титули.
Задмард со 15 поени беше најдобар кај Штип УГД, а го следеше Илиев со 13 поени, кај ГОК Борец е истакна Оливера со 14 поени, а Бастос имаше реализација од девет поени.
Вториот меч од финалната серија се игра в понеделник од 20 часот во Велес.
