Женската ракометна репрезентација на Македонија ги дозна своите противници за Европското првенство 2026, кое ќе се одржи во пет земји – Полска, Романија, Чешка, Словачка и Турција.
Нашата селекција ќе настапи во групата Б, каде ја очекуваат исклучително тешки предизвици против европскиот првак Норвешка, домаќинот Романија и селекцијата на Швајцарија. Натпреварите од оваа група ќе се играат во Клуж-Напока, Романија.
Континенталниот шампионат ќе се одржи од 3 до 20 декември, а за Македонија ова ќе биде уште едно значајно учество на големата сцена, трето во низа, што потврдува континуитет на настапите меѓу најдобрите европски селекции.
До пласманот на ЕП, македонските ракометарки стигнаа преку квалификациите, каде успеаја да обезбедат место меѓу најдобрите и покрај силната конкуренција.
Јасно е дека пред избраничките на селекторот Кристијан Грчевски стои тежок предизвик, но и голема можност за докажување против елитата на европскиот ракомет.
