На покана на претседателот на Фудбалската федерација на Македонија, Масар Омерагиќ, претседателот на УЕФА, Александар Чеферин, денеска е во официјална посета на ФФМ.
Оваа посета претставува уште една потврда за одличната соработка меѓу ФФМ и УЕФА, како на институционално, така и на лично ниво. Македонската „Куќа на фудбалот“ ужива висока репутација во европското фудбалско семејство, а присуството на Чеферин дополнително ја нагласува поддршката за развојот на фудбалот во земјата.
Во состав на делегацијата на УЕФА се и Зоран Лаковиќ, директор за национални асоцијации, како и Денис Бастари, раководител за развој на национални асоцијации.
За време на посетата, Чеферин ќе оствари средби на највисоко ниво со претставници на Владата, вклучително и премиерот Христијан Мицкоски и министерот за спорт Борко Ристовски, по што ќе следува и работен состанок во „Куќа на фудбалот“.
Фокусот на разговорите ќе биде насочен кон идните чекори за унапредување на македонскиот фудбал – од реализација на значајни инфраструктурни проекти, до дополнителна поддршка и развој на младинските категории.
Чеферин важи за голем пријател на македонскиот фудбал, а неговата посета е јасен показател за заложбите на ФФМ и претседателот Омерагиќ за континуиран напредок и афирмација на фудбалот.
Се очекува оваа посета да придонесе за продлабочување на соработката преку нови конкретни проекти и иницијативи под капата на УЕФА, со цел создавање подобри услови за развој на фудбалот на сите нивоа.
