Репрезентативната пауза заврши, продолжуваат возбудувањата во Првата футсал лига на Македонија каде веќе многу работи се решени и сега ќе се игра за конечен пласман на екипите во средишниот дел од табелата.
Проект и официјално стана шампион, а овој викенд и официјално во Втора лига ќе се преселат Балкан и Мал Ајакс, останатите екипи ќе играат за распределба на позициите односно за што повисок пласман.
Колото број 16 го отвараат Јувентус Серава и Форца во петок, каде гостинот е фаворит за трите бодови, а ланскиот шампион до крај ќе цели за втора позиција.
В сабота Балкан на домашен терен ќе игра против Бутел, каде реми или пораз за домаќинот ќе значи дека дебитантот и официјално е испаднат. Теоретски веќе клубот е преселен, а в сабота и математички оди експресно во Втора лига.
В недела во Штип ќе се одигра мечот меѓу Мал Ајакс и Осогово од Крива Паланка. Ова е последна надеж за штипјани, иако ќе биде речиси тешко. Девет бодови во игра до крајот, а Мал Ајакс има седум бодови негатива, и да биде перфектен до крај, треба и конкурентите да направат грешки.
Осогово доколку ги освои бодови во градот под Исарот, ќе направи скок на табелата, па во тој случај ќе води борба и за четврто место.
Новиот шампион Проект на домашен терен ќе игра против Шкупи, во меч каде домаќинот сака нова победа и со максимален ефект да ја подигне шампионската титула.
Колото се затвара дури во понеделник со мечот меѓу Кеги Моби и Клими, а интересно е тоа што мечот е закажан во Кавадарци наместо во Велес, па така двете екипи го менуваат домаќинството. Кеги Моби ќе биде формален домаќин, а Клими формален гостин.
Во однос на табелата на врвот е Проект со 45 бодови, втор е Кеги Моби со 29 бодови, а бод помалку има Форца која е трета.
На четвртото место е Шкупи со 20 бодови, а по 19 бодови имаат Бутел и Клими за делба на петтото место. Осогово е седми со 18 бодови, а Јувентус Серава е осми со 17 бодови, инаку на овој тим му беа одземени три бодови.
Во зоната за директно испаѓање е Мал Ајакс како претпоследен со десет бодови, а на дното е Балкан како последен со девет бодови.
