Уште шест кола до крајот на сезоната во Првата македонска фудбалска лига, шест меча и 18 бодови.
Пелистер е пред најтешкиот испит – дали ќе избори опстанок и следната сезона да биде дел од елитата или пак ќе се пресели во Втора лига.
Првиот чекор кон опстанокот на Пелистер започнува на домашен терен против Македонија ЃП, натпревар кој мора да се добие во спротивно тимот на Марјан Секуловски ќе биде во ситуација каде ќе биде речици „пречкртан“.
Веднаш потоа ќе следува гостувањето во Струмица каде Пелистер ќе бара бодови против Брера која засега делува сигурно и води борба за директен опстанок, со цел да се избегне баражот.
Битолчани потоа ќе имаат уште едно гостување во Скопје каде против Работнички ќе биде меч „да се биде или не“ во трката на два директни конкуренти за опстанок.
Потоа во Битола доаѓа веќе новиот второлигаш Шкупи, а ова значи и „резервирани“ три бодови за Пелистер. Следува „братското дерби“ во Кавадарци против Тиквеш и во последното коло Пелистер ќе решава со Башкими на домашен терен.
Зависно од тоа како Пелистер ќе одигра претходно, многу извесно може да решава и последното коло дали Пелистер ќе има директен опстанок, дали ќе игра бараж или веќе ќе биде откажан од таа трка.
