Ракометниот клуб Вардар продолжува со засилувањата за новата сезона, а најново име во составот е египетскиот репрезентативец Мохаб Абделхак. Станува збор за еден од најперспективните ракометари од својата генерација, кој игра на позицијата десен бек и доаѓа како значајно засилување за тимот.
Абделхак е леворак ракометар роден на 20 јануари 2003 година во Каиро и веќе е дел од сениорската репрезентација на Египет. Во Вардар пристигнува од редовите на германскиот гигант Кил, каде имаше можност да се развива и да стекне искуство на највисоко ниво.
Неговата кариера започна во египетскиот Ал Ахли, по што следуваше трансфер во француски Ним, каде дополнително го изгради својот потенцијал. Одличните настапи во Франција му донесоа ангажман во Кил, еден од најсилните клубови во Европа.
Со неговото доаѓање, Вардар добива модерен десен бек со силен шут, брзина и интернационално искуство, што ќе донесе дополнителен квалитет и ширина во ростерот за претстојните предизвици.
„Овој трансфер во РК Вардар претставува огромен чекор напред во мојата кариера и горд сум што доаѓам во клуб со толку силна историја и амбиција. Возбуден сум што ќе ја развивам својата игра, што ќе се натпреварувам на повисоко ниво и што ќе го дадам максимумот за тимот. Моите очекувања се да напредувам секој ден и да придонесам за заеднички големи резултати“, изјави Абделхак.
