Женската сениорска репрезентација на Македонија ќе одигра два пријателски натпревари против селекцијата на Косово, како дел од подготовките за настапот во Европската лига 2026, која воедно претставува и почеток на квалификацискиот циклус за Европското првенство 2028 година.
Новиот селектор, Милош Гавриловиќ, првата прозивка ја закажа за 13 мај во СЦ „Форца“ во Скопје, каде репрезентацијата ќе ги одработи подготовките. Двата контролни натпревари против Косово се закажани за 29 и 30 мај – едниот ќе се одигра во Скопје, додека домаќинот на вториот меч дополнително ќе биде одреден од Косовската федерација.
Македонија настапот во Европската лига 2026 ќе го започне во Порто. На 6 јуни противник ќе биде Унгарија, а веќе на 7 јуни следува дуел со домаќинот Португалија. Потоа репрезентацијата се сели во Аликанте, Шпанија, каде на 12 јуни ќе игра против Шпанија, а на 13 јуни ќе се соочи со Азербејџан.
Настапот во годинешното издание Македонија ќе го заврши на домашен терен во СЦ „Борис Трајковски“ во Скопје – на 19 јуни против Хрватска и на 21 јуни против Словенија.
