Женската репрезентација на Македонија со 0:5 загуби од Унгарија во Битола, во рамки на 3. коло од квалификациите за Светското првенство.
Не требаше многу за Унгарките да стигнат до рана почетна предност кога Емоке Папаи по само три минути постигна гол за водство на од 0:1, а веќе во 9. минута Викторија Панчурова капитулираше по вторпат на својот гол за водство на Унгарија од 0:2, а овој пат стрелаше Диана Чани.
Во 20. минута од средбата Чани со втор гол обезбеди предност од 0:3, а во судиското надополнување на првиот дел Савана беше прецизна за 0:4.
Ваквиот резултат го принуди селекторот Александар Андов да направи тројна измена на полувреме. Рабија Дервиши влезе во игра на местото на Александра Марковска, Пале Николовска беше повлечена, а на нејзино место влезе Катерина Петкова, а имаше измена и на голманската позиција, откако Викторија Панчурова беше повлечена, а на нејзино место меѓу стативите застана Евгенија Вељановска.
Во вториот дел Ана Јулија Цики ги постави конечните 0:5 со што Унгарија лесно ја оправда фаворитската улога и на своето конто додава нови три бодови.
Унгарија е на првото место на табелата со седум бодови, а Македонија со три бодови е трета во групата. Двете репрезентации ќе се соочат на 18 април, но сега на унгарско тло.
Македонија го запиша вториот пораз во квалификациите, откако претходно загуби од Азербејџан во гости со 2:0, а пак ја добивме Андора на домашен терен со 3:0.
