Брегалница е на добар пат да се врати во Првата македонска фудбалска лига, а искусниот стратег Влатко Костов е пред можноста да испише уште едно големо поглавје во својата тренерска кариера.
Во досегашната кариера, Костов дури петпати успеал да внесе екипи од Втора во Прва лига, а последен пат тоа го направи со Пелистер, враќајќи го битолскиот клуб таму каде што припаѓа – во елитата.
Претходно, истиот успех го оствари и со Хоризонт Турново, Брегалница, Куманово и Осогово од Кочани, потврдувајќи го својот квалитет како еден од најуспешните македонски тренери кога станува збор за промоции во повисок ранг.
Сега, 60-годишниот стратег е на чекор до шести ваков успех во кариерата, а воедно и вторпат да ја врати Брегалница во прволигашкото друштво.
На шест кола до крајот на ВМФЛ, Брегалница се наоѓа на врвот на табелата со 55 бодови, два повеќе од конкурентите Охрид, Скопје и Шкендија Арачиново, што најавува возбудлива завршница во битката за пласман во елитата.
Покрај успесите во Втората лига, Костов има и значајни достигнувања во Првата лига – со Ренова ја освои шампионската титула во сезоната 2009/2010, а две години подоцна го подигна и Купот на Македонија (2011/2012).
Брегалница и Костов се на праг на нов голем успех – останува да се види дали искусниот стратег уште еднаш ќе ја потврди својата „златна формула“ за влез во елитата.
