Футсал репрезентацијата на Македонија обезбеди пласман во главната рунда од квалификациите за Светското првенство со максимален ефект во предквалификацискиот турнир.
Нашите репрезентативци денеска го совладаа домаќинот Литванија со минимални 0:1, откако претходно славеа против Турција (6:3) и Бугарија (4:1), со што го освоија првото место во групата со максимални девет бодови.
Селекторот Газменд Хисејини веднаш по натпреварот даде ексклузивна изјава за Спортска Мрежа, во која потенцираше дека тимот уште од старт имал јасна цел – три победи на турнирот.
„Точно така, три победи во групата, јас уште кога тргнавме од Македонија за Литванија им кажав на играчите, дека одиме на три победи и бевме подготвени за тоа и на крај ја остваривме зацртаната цел, да имаме три победи“, рече селекторот Газменд Хисејини во изјава за Спортска Мрежа.
Хисејини нагласи дека следува уште потежок предизвик, но верува во младите сили кои се дел од репрезентацијата.
„Главната рунда нормално е потешка, ни сме во фаза кога имаме смена на генерации, но ние е дадеме се од себе за да стигнеме што подалеку, но нашата цела е да обезбедиме пласман на Европското првенство 2030“, дополни Хисејини во ексклузивна изјава за Спортска Мрежа.
Македонија со перфектен учинок го заокружи турнирот и со голема самодоверба ќе ја дочека главната рунда од квалификациите.
