Работнички по поразот од Шкендија (0-3) е пред нов голем предизвик. Во 27.коло ќе ги одмери силите со лидерот на табелата Вардар на Арената „Тодор Проески“.
Грешките од претходниот дуел не треба да се повторат, а избраниците на Муарем Муарем се надеваат дека можат да останат непоразени во градската пресметка со „црвено-црните“.
Работнички се бори за опстанок и секој освоен бод е од исклучително значење за клубот од Дебар Маало.
„Вардар е лидер и се бори за шампионската титула, но и ние имаме своја цел, да обезбедиме опстанок во елитата. Ќе се бориме до последен атом на силите, затоа што секој бод за нас е исклучително важен до крајот на сезоната. Верувам дека тимот ќе успее да се врати психолошки по поразот од Шкендија, а мотивацијата секако е на највисоко ниво. Се надеваме дека ќе успееме да ја оствариме нашата цел“, изјави Муарем Муарем.
Натпреварот меѓу Вардар и Работнички ќе се одигра на Арената „Тодор Проески“, со почеток во 15:30 часот.
