Превалец однесе убедлива победа од 5:0 над Влазними Јуниор на домашен терен, во меч каде сите работи беа решени во првиот дел кога домаќинот имаше предност од три погодоци, во рамки на денешното 20. коло на Трета лига – Југ.
Александар Јордановски го отвори резултатот по седум минути игра, а потоа стрелаа Марио Панев и Марјан Стефановски. Во второто полувреме Лука Наумов и Ѓоре Црнушев ги поставија конечните 5:0 за висок триумф на Превалец.
Росоман се „распадна“ во Крушево откако загуби со 5:1 од Питу Гули во меч на тотална доминација на домаќините, а гостинот продолжува да реди високи порази.
Јованчо Бубаќоски постигна хет-трик за домаќинот, а два гола беа дело на Унчо Бојаџиески, а пак за гостинот погоди Николчо Наумов.
Млекар со сигурни 2:0 славеше триумф над Младост од Кривогаштани благодарение на погодоците на Филип Трајкоски.
Борец се намачи во Чашка каде со голот на Теодор Мирчевски од 4. минута го совлада Башкими од Јаболчиште со минимални 0:1, со што трите бодови одат на контото на лидерот од Велес.
Неверојатен меч одиграа Ултрас и Венец – пет погодоци, а трите бодови заминаа на контото на гостинот од Долни Дисан кој беше подобар со 2:3.
Искусниот голгетер Кирил Неделков беше херојот за гостинскиот тим, со неговите три погодоци Венец ги освои трите бодови, а за домаќинот во вториот дел стрелаа Христијан Баракоски и Петар Петроски.
На врвот е Борец со 52 бодови, тимот на Превалец е втор со 46 бодови, но со меч помалку, трет е Венец со 40 бодови, но тука трката останува меѓу Борец и Превалец.
