Финалната серија од плејофот во машкото национално првенство започнува на 16 април во Штип, каде што најдобрите две екипи оваа сезона, Штип УГД и ГОК Борец, ќе ја отворат борбата за шампионската титула. Титулата ќе ја освои тимот кој прв ќе стигне до три победи.
Штип УГД, лидер на табелата, и ГОК Борец, второпласираниот тим, во текот на целата сезона демонстрираа стабилност и квалитет, што им обезбеди место и во финалето на Купот на ОФМ 2026, одиграно пред десетина дена во Скопје. Сега, повторно ќе се соочат во директна пресметка за нов трофеј – шампионскиот.
Во координација со националниот сервис, кој ќе врши директен пренос, финалната серија „подобар од пет“ ќе се игра во термините понеделник и четврток.
Штип УГД во финалето влегува како освојувач на Купот на ОФМ 2026 и со јасна цел да ги обедини титулите, додека ГОК Борец по пауза од три години се враќа во битка за својата прва шампионска круна од осамостојувањето на Македонија.
ФИНАЛЕ НА ПЛЕЈОФ МАЖИ
РАСПОРЕД НА НАТПРЕВАРИ
1.НАТПРЕВАР (16.04.2026) – Штип УГД – ГОК Борец (Штип)
2.НАТПРЕВАР (20.04.2026) – ГОК Борец – Штип УГД (Велес)
3.НАТПРЕВАР (23.04.2026) – Штип УГД – ГОК Борец (Штип)
4.НАТПРЕВАР (27.04.2026) – ГОК Борец – Штип УГД (Велес)
5.НАТПРЕВАР (30.04.2026) – Штип УГД – ГОК Борец (Штип)
