Екипите на Гевгелија и на Шар Планина ќе играат во финалната серија од доигрувањето за пополнување на место во Првата македонска лига во наредната натпреварувачка сезона.
Ова е разврската по одигрувањето на третите натпревари од полуфиналната серија, во кои двете екипи ја искористија предноста на домашниот терен, и се пласираа во финалната.
Екипата на Гевгелија беше убедлива во мечот против ИБА баскет, славеше со високи (85:63) и со конечни (2-1) ја затвори оваа полуфинална серија.
Гостите од Скопје ја добија првата четвртина со (16:14), но гевгеличани се вратија во втората, и на полувремето имаа минимално водство, (37:34).
Како решавачки се покажаа десетте минути од третата четвртина, оние во кои домашната екипа ја направи клучната предност.
Го добија тој дел домаќините со (26:14), за сигурно водство (63:48), кое го претворија во потребен триумф.
Колев и Митев реализираа по 15.поени, а Апостолов и Лазаревски уште по 13.во победничката екипа. Во гостинската, Божиновски и Смилковски постигнаа по 15.поени, додека Станков додаде уште 11.
Противник на Гевгелија во финалето ќе биде екипата на Шар Планина, која пред својата публика во салата „Младост“ беше подобра од винички Винеам.
Славеа гостиварци со сигурни (69:58), доволни за место во финалето.
Гостиварци ја имаа предноста во целиот тек на натпреварот.
Во првиот период поведоа со (21:19), на полувремето имаа нешто повисоки (38:34). Ништо не се смени ниту по паузата, Шар Планина полека но сигурно го бараше патот кон финалето. По три одиграни периоди, домаќините водеа со (55:48), резултат кој го одбранија во последните десет минути.
Балоски го предводеше домашниот состав со 26.реализирани поени, Исајлоски имаше уште 14. На другата страна, Панов постигна 17, Саздановски 12, а Радовановиќ и Тодосиев имаа по девет поени.
