Дејан Георгиевски, стипендист на МОК, уште еднаш потврди дека се наоѓа во одлична форма, освојувајќи златен медал на силниот меѓународен турнир „Скопје опен Рамус Г1“, кој се одржа во СЦ „Борис Трајковски“.
Неговиот пат до највисокото место на пиедесталот беше импресивен и исполнет со врвни победи. Георгиевски најпрво славеше против Абдула Ал Магди, а потоа забележа значајна победа над европскиот шампион Иван Шапина. Во полуфиналето беше подобар од Пашко Вожиќ, за во финалето да круниса одличен настап со доминантна победа над Илиа Рудерман.
Овој успех носи и дополнителна тежина ако се знае дека турнирот собра повеќе од 1.000 натпреварувачи од 41 држава, што го прави еден од најсилните во регионот.
Со освојувањето на златниот медал, Георгиевски обезбеди и важни бодови во трката за олимписка норма – клучен чекор кон настап на најголемата спортска сцена.
Доколку продолжи во овој ритам, македонскиот таеквондист останува сериозен кандидат за пласман на Олимписките игри и еден од главните адути на Македонија.
