Женската ракометна репрезентација на Македонија ја очекува важен предизвик во квалификациите за Европското првенство, откако на домашен терен ќе се соочи со селекцијата на Германија.
Натпреварот ќе се одигра на 8 април со почеток од 18:00 часот во СЦ „Борис Трајковски“, а од Ракометна федерација на Македонија донесоа одлука која сигурно ќе израдува многу љубители на ракометот – влезот за овој натпревар ќе биде бесплатен.
Со ваквиот потег, целта е трибините да бидат исполнети и македонските ракометарки да добијат силна поддршка во дуелот против еден од најквалитетните европски состави. Германија, како актуелен светски вицепрвак, претставува сериозен предизвик, но воедно и можност за голем тест за домашната селекција.
Ова ќе биде и последниот натпревар на Македонија на домашен терен во овие квалификации, по што следува гостување кај Словенија, со што ќе се заокружи циклусот.
Се очекува вистинска ракометна атмосфера во Скопје, каде публиката ќе има можност бесплатно да ужива во квалитетен натпревар и да даде поддршка на националниот тим.
