Новиот шампион Проект вечерва лесно се чекираше во големото финале од футсал Купот на Македонија откако со неверојатни 11:0 буквално го „збриша“ тимот на Клими од Кавадарци.
Тимот од Јосифово имаше лесна задача вечерва во Гевгелија, а гостинската екипа од Кавадарци немаше сили ниту на момент да го запре налетот на расположениот Проект кој сигурно оди кон освојување на двојната круна.
Дури четири играчи беа двојни стрелци – Мартин Тодоровски, Ѓорги Коцевски, Марио Благојевски и Трајче Димитриев, а пак по еден гол постигнаа Наум Блажевски, Димитар Јанев и Кристијан Гавровски.
Утре се игра вториот полуфинален меч меѓу Кеги Моби и Јувентус Серава, а победникот во големото финале ќе се соочи со Проект.
