Со мечевите од осмото коло започна пролетната полусезона во Втората женска фудбалска лига, а на самиот старт еден натпревар не се одигра.
Во Охрид требаше да се одигра мечот меѓу Билјанини Извори и Порече, но тимот од Македонски Брод не допатува во Охрид, бидејќи по чекање од 30 минути не пристигна ниту еден нивен претставник, а тоа значи службена победа од 3:0 за екипата на Билјанини Извори.
Непоразениот лидер Конзули од Битола славеше убедлива победа од 0:8 над Борец во Велес, во меч каде двојни стрелци беа Мелица Милица Димитриоска и Мина Коваческа. По еден гол постигнаа Марија Стојановска, Тамара Нешковска и Сара Петровска, а пак Магдалена Ѓорѓиева си постигна автогол.
Екипата на Слободен со 2:5 славеше во Радовиш над Плачковица, што беше за очекуван овој триумф. Новото засилување Ева Андонова постигна два гола за скопскиот тим, а по еднаш погодија Михаела Симоновска, Натали Павловска и Мила Стојановска.
За домаќинот од Радовиш во 53. минута погоди Михаела Ангеловска, а во 77. минута стрелаше новото засилување Ана Димов.
Конзули е прв со 24 бодови, второ е тимот на Билјанини Извори со 16 бодови, колку што има и Порече, а пак на четвртото место е Слободен со девет бодови.
На петтото место со три бодови е Плачковица, а толку има и Борец кој е на дното.
Извесно е дека Порече ќе биде санкциониран поради неодигрувањето на мечот во Охрид, но ќе причекаме на официјална одлука на ФФМ.
