Џудо клубот Дрим од Струга имаше извонреден настап на Државното првенство кое се одржа во спортската сала „Јане Сандански“ во Скопје, настан кој донесе врвни борби, силна конкуренција и одличен натпреварувачки дух.
Стружани уште еднаш покажаа дека располагаат со квалитетни натпреварувачи, кои со дисциплина, борбеност и шампионски менталитет оставија силен впечаток на татамито.
Во конкуренција на пионери/ки, клубот освои повеќе одличја:
Златни медали освоија Елеонора Јосифоска (-57 кг), Дариан Ночески (-42 кг), Давид Спироски (-55 кг) и Енил Ајдиноски (-66 кг).
Сребрени медали освоија Мишела Јаулевска (-63 кг), Матеј Димитроски (-42 кг), Мунир Ајдински (-50 кг) и Дамјан Пејоски (-38 кг).
Бронзени одличја освоија Софија Ноческа (-48 кг) и Даниел Јосифоски (-73 кг).
Успешни беа и сениорите, каде Анамарија Стојмиловска (-52 кг) се закити со злато, Андреј Симоноски (-81 кг) освои сребро, додека бронзени медали освоија Драгица Рафтоска (-63 кг), Амар Бајрамоски (-60 кг) и Андреј Чакаровски (-90 кг).
Овој успех е резултат на континуирана работа, посветеност и голема желба за напредок. Секој медал е потврда за вложениот труд, но и дополнителна мотивација за нови предизвици.
Од клубот упатија честитки до сите натпреварувачи за прикажаната борбеност, како и благодарност до тренерите и поддржувачите кои стојат зад нивниот развој. Настапот во Скопје е уште еден доказ дека ЏК Дрим сигурно чекори кон нови успеси.
