Вечерва од 18 часот, на Градскиот стадион во Штип, фудбалската сцена ќе понуди дерби со огромен влог – пресметка меѓу Брегалница и Охрид која може директно да влијае на врвот во Втората лига.
Традицијата е на страната на штипјани, кои доминираат во меѓусебните дуели, додека Охрид веќе 17 години чека на триумф против овој ривал.
Сепак, формата и квалитетот на двете екипи оваа сезона се речиси израмнети, што најавува неизвесен натпревар до последната минута.
И двете екипи имаа осцилации во текот на сезоната, со неочекувани резултати кои ги оттурнаа од сигурна позиција на врвот. Интересно е што токму Осогово барем засега се покажа како „кобен“ противник за двата тима – славеше над Брегалница во Штип, а го совлада и Охрид на домашен терен во Кочани.
Во пресрет на дербито, Охрид влегува како лидер со 49 бодови, додека Брегалница е четврта со 46, што значи дека само три бода ги делат двата ривали. Со оглед на тоа дека само првата позиција носи директен пласман во Првата лига, јасно е дека притисокот е огромен и кај двата табора.
Штип буквално се мобилизираше за овој натпревар – се очекува силна поддршка од трибините и полн стадион, што дополнително ќе ја загрее атмосферата под рефлекторите.
Прашањето е јасно: дали традицијата ќе продолжи во корист на Брегалница или пак Охрид конечно ќе го скрши малерот и ќе направи голем чекор кон елитата? Одговорот ќе го даде дербито кое ветува вистинска фудбалска драма.
Главен судија ќе биде Бењамин Ќерими од Скопје.
