Репрезентацијата на Македонија до 17 години ќе учествува во елитните квалификации за пласман на Европското првенство. По одличните настапи во претходната фаза, тимот предводен од селекторот Влатко Колев се подготвува за нови, големи предизвици.
На турнирот што ќе се одржи во Словенија, нашите репрезентативци ќе се соочат со силни противници. Покрај мечот со домаќинот, селекцијата ќе се сретне и со репрезентациите на Германија и Франција.
“Самиот пласман во елитната фаза од квалификациите за Европското првенство, оваа генерација постигна голем успех. И покрај фактот што имаме исклучително тешки противници ќе се обидеме да направиме изненадување и нашата цел е да освоиме што е можно повеќе бодови. На турнирот ќе се соочиме со великаните на европскиот фудбал Германија и Франција, а тука е и домаќинот Словенија. Верувам дека фудбалерите кои ќе настапат на овој турнир ќе одиграат на највисоко ниво и дека ќе бидеме рамноправни во дуелите со фаворизираните противници. Момците се максимално подготвени за следните предизвици и дека претстојните три натпревари ќе бидат уште едно големо искуство за оваа талентирана генерација”, изјави Колев.
Нашиот прв противник во квалификациите ни е репрезентацијата на Германија, а натпреварот се игра утре, со почеток од 16 часот. На 28-ми во истиот термин се среќаваме со Франција, а на 31. играме со домаќинот Словенија.
