Македонската фудбалска репрезентација веќе втор ден тренира во тренинг центарот „Петар Милошевски“, каде ги продолжува подготовките за првиот плеј-оф натпревар против Данска во борбата за пласман на Светското првенство. Атмосферата во тимот е работна, а фокусот целосно насочен кон претстојниот предизвик.
Репрезентативецот Александар Трајковски истакна дека селекцијата мора да пристапи со максимална сериозност и одговорност на овој натпревар, имајќи предвид квалитетот на противникот.
Напаѓачот, кој пред четири години во Палермо го постигна историскиот погодок против Италија за пласман во финалниот бараж за СП 2022, верува дека новата енергија и мотивираност во тимот можат да донесат позитивен резултат. Според него, дисциплината, фокусот и концентрацијата ќе бидат пресудни фактори во дуелот со силната селекција на Данска.
„Со нов селектор доаѓа нова енергија и нова визија. Мислам дека добро ќе се подготвиме за овој натпревар. Вчера првпат се приклучив и навистина видов одлична атмосфера и квалитетен тренинг. Ако продолжиме вака, ќе бидеме максимално подготвени“, изјави Трајковски.
„Данска можеби е фаворит на хартија, но ние сме покажале дека можеме да играме против секого. Верувам во оваа екипа. Изјавите од нивна страна може само дополнително да нè мотивираат“, додаде напаѓачот.
„Искрено, ова е еден од најважните натпревари во мојата кариера на репрезентативен план. Нема поубаво чувство од победа во вакви моменти и можност да се бориш за пласман на Светско првенство. Се надевам дека ќе успееме да го повториме успехот од Палермо.“
„Ова е фудбал, се игра еден натпревар и сè е можно. Ќе ја анализираме Данска, ќе ги бараме нивните слабости и ќе се обидеме да ги искористиме. Само така можеме да дојдеме до посакуваниот резултат“, заврши Трајковски.
