Македонската репрезентација денеска ги започна подготовките за претстојниот плеј-оф дуел против Данска во борбата за пласман на Светското првенство. Под водство на новиот селектор Гоце Седлоски, националниот тим го одработи првиот тренинг на тренинг центарот „Петар Милошевски“.
Поради отсуство на неколкумина фудбалери, кои се очекува да му се приклучат на тимот во текот на вечерта, своите први впечатоци ги сподели Себастијан Херера од Борац Бања Лука. Тој нагласи дека репрезентацијата мора да биде максимално мотивирана и да верува во сопствениот квалитет пред гостувањето во Копенхаген на 26 март.
„За мене ова е нешто најголемо што може да се случи во мојата кариера, да го облечам дресот на Македонија. Навистина е чест и огромно задоволство што сум тука. Ќе дадам сè од себе за да помогнам на репрезентацијата. Ова го посакував, го чекав и го сонував долго време и среќен сум што конечно дојде моментот. Со нетрпение очекувам да започнеме.
Најважно е да бидеме тим, сите заедно. Знам дека на мојата позиција Алиоски има големо искуство и многу години во репрезентацијата, и тоа е дополнителна мотивација. Очекувам тежок натпревар. Данска е силна репрезентација, но ние се фокусираме на нас самите. Верувам дека натпреварот е 50-50 и дека сè зависи од нас. Одиме максимално мотивирани и се надевам на позитивен резултат, зошто да не и пласман во финале.“
